30 აპრილს საქართველოს ეროვნული ბიბლიოთეკის საგამოფენო დარბაზში ბიბლიოთეკარის დღისადმი მიძღვნილი ღონისძიება გაიმართა. ღონისძიებას საქართველოს კულტურის მინისტრი თინათინ რუხაძე, კულტურის მინისტრის მოადგილე ბექა დავითულიანი, ეროვნული ბიბლიოთეკის წარმომადგენლები, ასევე საქართველოს რეგიონების ბიბლიოთეკებიდან მოწვეული სტუმრები დაესწრნენ.
აუდიტორიას სიტყვით მიმართა ეროვნული ბიბლიოთეკის გენერალურმა დირექტორმა, კონსტანტინე გამსახურდიამ. „ეროვნული ბიბლიოთეკა ქვეყნის მთავარი ბიბლიოთეკაა, რომელიც კოორდინაციას უწევს საბიბლიოთეკო საქმეს მთელს ქვეყანაში. ჩვენი ბიბლიოთეკა თანამედროვეობის გამოწვევებსაც პასუხობს – გვაქვს საზოგადოებისთვის მეტად საჭირო და მნიშვნელოვანი ციფრული ბაზები. ბიბლიოთეკარის დღეს ვაჯილდოვებთ ბიბლიოთეკარებს, რომელთაც განსაკუთრებული წვლილი შეიტანეს საქართველოში საბიბლიოთეკო საქმის განვითარებაში“, – განაცხადა კონსტანტინე გამსახურდიამ.
ბიბლიოთეკარებს პროფესიული დღესასწაული მიულოცა საქართველოს კულტურის მინისტრმა, თინათინ რუხაძემ.
ეროვნული ბიბლიოთეკის დირექტორის მოადგილემ, მირიან ხოსიტაშვილმა ხაზი გაუსვა რეგიონული ბიბლიოთეკების კულტურულ-საგანმანათლებლო ცენტრებად გარდაქმნის მნიშვნელობას.
ეროვნული ბიბლიოთეკის საქმიანობის ამსახველი პრეზენტაციები წარმოადგინეს საბიბლიოთეკო მომსახურებისა და ინფორმაციის დეპარტამენტის დირექტორის მოადგილემ ია გორგიშელმა და ელექტრონული რესურსების ორგანიზაციის განყოფილების უფროსმა ქეთევან თომაძემ.
საქართველოს ეროვნული ბიბლიოთეკა ამ თარიღს ყოველწლიურად სხვადასხვა სახის ღონისძიებას უძღვნის. 2025 წელს ბიბლიოთეკარის დღე მასშტაბურად აღინიშნა. საბიბლიოთეკო საქმეში შეტანილი განსაკუთრებული წვლილისთვის ეროვნული ბიბლიოთეკიდან და რეგიონებიდან დაჯილდოვდნენ ბიბლიოთეკარები: სულიკო სვანიძე, ნუნუ ჭელიძე, ბესო არახამია, გიორგი ჟუჟუნაძე, ტატიანა მაჭავარიანი, დოდო ცინცაბაძე, იამზე ონიანი და ეთერ იმნაძე. მათ სპეციალურად ამ დღისთვის შექმნილი დიმიტრი ყიფიანის სახელობის მედალიონები, სიგელები და საჩუქრები გადაეცათ.
დარბაზში, ღონისძიების პარალელურად, წარმოდგენილი იყო ეროვნული ბიბლიოთეკის მიერ ბოლო პერიოდში შეძენილი იშვიათი გამოცემები, ფოტოები, ხელნაწერები.
